富家女ParisHilton，上年因為拍霍士電視台嘅真人騷《TheSimpleLife》而上位。早排電視台見套劇咁收得，所以即時添食拍第二輯，不過Paris喺開工嘅時候發生墮馬意外，重搞到要入醫院，當時Paris墮馬嘅片段，重啱啱曝光。
當日Paris同拍檔NicoleRichie喺佛羅里達州學騎馬，不過姐手姐腳嘅Paris喺隻馬上面亂咁郁，搞到隻馬發晒脾氣，最後重拋咗佢落地。好彩事後Paris重企得番起身，佢當時摸住個肚，個樣鬼咁可憐，重要Nicole呵番。雖然Paris似乎只係受咗皮外傷，不過Paris身嬌肉貴，監製梗係唔放心，所以即時叫咗架直升機到場送佢去醫院。
而Paris拍第一輯《TheSimpleLife》嗰陣，曾經去咗阿肯色州一家平民嘅屋企住，不過近日Paris話經常俾嗰家人煩住，懷疑佢哋想黐自己啲金糠。不過嗰家人就反駁話Paris有妄想症，因為佢哋根本唔想有Paris呢種人做朋友。另外，近排Paris同男友NickCarter打得火熱，近日佢去到邊都戴住隻梨形鑽戒，唔少人懷疑佢已經秘密訂婚。