校本條例政治陰謀，終於「通過」。特區將會實行所謂「法團校董會」，加入所謂家長教師代表，話咁至係實行「教育民主」。
特區政府呢番廢話，係用嚟呃細路，其實目的就係針對天主教及基督教學校，打擊恨之刺骨嘅教會。當共產黨未曾奪得權力時，佢就會猛咁同你講民主，教會辦學，左共毫無話事權，佢就用「民主」兩個字嚟進攻。好嘞，等到佢大權在握，例如特區政權，二○○七年○八年你話要多啲民主咩？佢就扯下面具，大罵你搞「港獨」。
一通過校本條例，特區政府就會夥同左共，實行毛澤東「摻沙子、挖牆角」戰術，長期滲透教會學校，跟住呢啲「家長代表」、「教師代表」，就會以「校董」身份，拍枱拍櫈，喝令要加入「反帝愛國教育課程」、要「揭露美英傳教士借傳教為名侵略我國」嘅「事實」，跟住又會喝令，喺周會祈禱之前，要全體師生探討吓：「中國共產黨同天父，邊個至係全能嘅主？」讀聖經嘅同時，要辯論吓「聖經係咪可以凌駕基本法？」等等。
陳日君主教有警覺性，佢知道教會學校係特區政府及民建聯眼中「加強愛國教育」阻頭阻勢嘅絆腳石。「民主」為名，擴大洗腦為實，老人家得天主引領，果然目光如炬，魔鬼無所遁形。
不過唔怕。邪不能勝正。教會學校可以做好多防禦措施，維持教會學校嘅校本純潔，不受政治病毒入侵。
第一，校本條例執行後，教會同時執行「家長教師大一統教育理念政策」，除咗教師一定要係天主教或基督教徒之外，收生亦要一律嚴格，面試時重要見埋家長，若然發現父母是但一方出現某種香港人的神憎鬼厭嘅政治傾向，話知佢個仔十優九良，都不予取錄，請佢同個仔報名入讀培僑香島。
第二，要家長簽署協議書，協議全文如下：「本校以天主教（或基督教）教義辦學，奉天父耶和華為最高效忠對象，其他一切對凡間人為偶像，包括國家、政權、領袖等之崇拜，如與本校宗教教義有牴觸，本校概不承認，即使貴家長或教師加入校董會，亦無權改變。」
第三，要向全港宣示，校方之最高權力當局，係梵蒂岡，校長一切決定，皆代表教廷，如有任何不滿，請透過外交途徑向教廷上訴，惟中華人民共和國政府與教廷無邦交，因此一切紛爭可轉託台灣中華民國政府上呈。
傳真︰2623-9278
電郵︰