台灣男子組合F4成員之一嘅言承旭，喺東南亞擁有好多fans，原來言承旭入行，係透過參加模特兒比賽。
馮仁昭八到言承旭九八年喺台灣參加過「第二屆台灣Hito超級男模大賽」，重攞咗冠軍，睇番佢當時參賽個樣，雖然唔算好「老土」，但同𠵱家成為瘋魔萬千少女嘅言承旭比較，就真係爭好遠，睇睇吓重覺得佢個樣有啲怪，唔知邊度唔同咗呢？
香港嘅亞視以前都搞過港男選舉，不過得獎嘅港男都喺娛樂圈冇乜發展，所以咪冇咗咯。言承旭有咁好嘅演藝成績，自然成為台灣呢個模特兒大賽嘅生招牌啦，而嚟緊入咗圍嘅二十個男模，將有機會出席九月四日舉行嘅「2004全球華語歌曲排行榜頒獎典禮」，除咗同一眾歌手一齊行星光大道外，重可以喺頒獎禮上做遞獎男模，話唔定就係咁俾人發掘，成為第二個言承旭㗎。
女子組合Cookies嘅成員Theresa、Miki同Stephy噚日去咗紅磡海逸酒店出席「健康第壹大獎2004」頒獎禮，Theresa打扮得好斯文大方，謀殺不少菲林，而Cookies就得到大會頒發嘅「最具活力健康大獎」。
韓國靚仔元斌都幾錫本地fans，佢雖然好忙，但都決定下個星期二單拖嚟香港宣傳韓片《太極旗飄揚：生死有情》。我馮仁昭收到料元斌會喺下個星期二黃昏時間抵港，星期三就展開一連串嘅宣傳工作，好似出席影片記者會同首映禮，佢預計會喺下星期四返韓國，所以本地嘅fans一定要把握見偶像嘅機會喇！
鄭融成為MP3產品代言人，噚日佢喺中環出席記者會時遲咗成個鐘，佢話：「可能係誤會啦，因為我嚟之前要跟杜麗莎學唱歌，但我已經知會咗大會，佢哋知道呢件事。」鄭融透露將會出寫真集，佢話：「呢次拍寫真最辛苦，每日都要周圍去影，曬到塊面起粒粒。」
梁洛施（Isabella）噚日喺灣仔拍攝新一輯護膚品廣告，佢話今次酬金加咗，所以特別開心，佢話：「加咗少少，好開心，不過重未出糧，唔知點解近期出得特別慢。」佢助手一聽到呢句說話，即刻幫Isabella解畫話：「唔係，出咗佢唔知，佢出糧係入晒佢媽咪戶口度。」
