組合2R早前在泰國拍攝由李心潔男友彭順執導的新片《死亡寫真》，2R姊姊黃婉君（Rosanne）碰巧於當地度過牛一，而彭順就悉心安排2R與父母歎印尼菜享天倫，難怪2R勁讚彭順：「佢好抵鍾意㗎！」
姊妹花組合2R早前在泰國逗留了一個月，拍攝由李心潔男友彭順執導的驚慄片《死亡寫真》，兩姊妹直至日前才回港，而姊姊Rosanne於上月三十號二十五歲牛一，要在當地過生日，彭順特別安排2R放了兩天假，好讓兩姊妹能與專程飛至泰國探班的父母樂敍天倫。
2R日前接受本報電話訪問時，兩姊妹均對彭順讚口不絕，Rosanne在電話中說：「導演好錫我哋，佢知道我生日，又知道我爹哋媽咪過咗嚟，就安排我哋一家人去慶祝，搵咗一間好高級嘅印尼餐廳食飯。」2R又稱彭順是個細心的好男人，提到李心潔也對彭順死心塌地時，她們即笑說：「佢真係好好人，佢好抵鍾意㗎！」
2R揚言她們是演戲方面的新人，彭順不僅對她倆循循善誘，而且還很有辦法令她們在拍攝期間落淚，2R說：「有時我哋喊唔出，佢行埋嚟同我哋講啲嘢，佢一講到我哋嘅屋企，咁就會喊出嚟。」
至於生日願望，Rosanne說：「想有多啲香港朋友錫2R，我哋走咗一個月，好驚香港啲朋友唔記得我哋。」而她在泰國拍片期間，有八名fans組團到泰國為Rosanne賀牛一，令她很開心，Rosanne還透露今年生日吃了五個生日蛋糕。
採訪：朱倬誼
