地產代理上半年豐收，好似龍頭大行中記，年初原定半年目標收七億五，轉眼就超標，有逾八億二，較預期超出七千幾萬，成績咁好，前晚舉行完慶功宴，管理層決定，繼第一季發放一個月花紅後，再派四分一個月花紅，獎勵後勤員工，分甘同味咁話。
姊姊公司利記成績都唔弱，執董廖偉強話，上半年收兩億六，比起舊年同期增加一倍。雖然成績唔錯，廖董話唔可以掉以輕心，希望下半年保持佳績，大灑金錢嘅活動應免則免。
地產代理除努力促成交易搵錢，重要學習多方面知識，及接受不同訓練，好似世紀21，最近辦「野戰訓練營」，培養員工團體精神，及提高個人潛能。
世紀21荃灣代理及後勤，一行十五人，日前去西貢參加野戰訓練。
聽講，當日共分三節比試，每次都有賽後檢討，等大家知道問題所在。好多搞到周身傷，但都覺得值得，話對日常工作有幫助。
半年過去，各代理行都例牌有回顧展望，所公布統計數據，都有參考價值。
屋之島物業報告指出，上半年港島及尖沙嘴甲級商廈，共有二百七十五宗買賣，較去年同期多三成半，樓面九十二萬呎，增加一成，但總值就急彈七成七，有近四十四億。
十大交投最活躍甲級商廈，成交宗數最多係金鐘力寶中心，有五十二宗；成交樓面及總值最多同為上環信德中心，分別為十九萬呎及八億五。至於整體成交宗數、涉及樓面及總值，都比去年同期為多。
香港豪宅熱，造價大升，原來內地豪宅一樣搶手，戴德梁行報告，廣州二手豪宅年初續漲價，原因係幾年前起嘅豪宅質素高，加上附近環境變得成熟，買家信心大過新建豪宅，好多轉投二手市場，咁二手豪宅造價又點可以唔升呢？
好似新世界棕櫚園，每呎一○二二元，係唯一呎價過千嘅二手豪宅。同區公寓式住宅嶺南會，每呎月租要成十二個半。
市建局重建項目，呢排一個未截標，另一個已登場招收意向書，該局喺收購舊區物業方面同樣積極。
蘭西聽聞，早排一度搞到話要放棄嘅灣仔利東街重建項目，市建局繼續與接納收購嘅小業主辦理手續。
據聞，部份小業主喺簽署正式買賣合約時，可以攞到樓價三成首期。
市建局一向喺簽訂正式買賣合約時，支付一成樓價畀小業主，不過，對於一啲向該局表明有財政困難嘅小業主，市建局都肯先畀三成樓價，可見都唔係咁冇人情味。
蘭西
電郵地址：
