阿董見完民主派喺政府總部，無奈話，自己冇權更改人大釋法決定，不過就會嘗試代向中方反映港人意見，即時出現雷公怒劈嘅天譴警告！
可能終於感受到天怒，阿董晚上宣布，衞生福利及食物局局長楊永強因沙士責任問題而辭職！
楊局長辭職，真係好可惜。因為，特區政府同中方，猛嗌話要「行政主導」。楊永強辭職，呢件事又一次唔由行政來主導，而係立法主導，因為民主黨要求、自由黨附和，同埋保皇有責嘅民建聯亦轉軚支持，竟然三黨聯盟，再次玩殘政府，政黨形成炒楊共識，「行政主導」再次低頭投降，特區政府唔踢唔郁，再踢至龜縮，咁又點樣建立一個中方所講嘅「強勢政府」？
靚仔強辭職，又令人諗起「經一事、長一智」。沙士風暴，強哥既然長咗一智，咁又點解要辭職？土共乜唔係話「問責唔一定要辭職」咩？乜唔係「民主派脅迫政府，一定要人頭落地」咩？「辭職好容易，留下來更難」。好嘞，楊永強辭職嘞，「經一事、長一智」嘅六字治港真言，原來又試唔存在咯喎。
最弊嘅就係，特區「民粹主義」進一步高漲。因為沙士受難人嘅郭氏家庭，因為郭名慧小朋友嘅阿媽不幸中招去世，溫家寶訪港，亦親自做騷上門慰問。今次，郭名慧小朋友嘅父親郭善雄，親自打電話去電台，怒斥楊永強「厚顏無恥」，又呼籲「希望中方聽見我嘅聲音」。郭先生一聲怒吼，唔知係咪溫家寶親自干預，中方滿足要求，終於有反應，咁樣任由民意去左右中央政策，咪就係中方所最驚嘅「民粹主義」囉。咁又點怪得民主派同香港市民「有樣學樣」，希望中方聽見第二次五十萬人大遊行嘅聲音，要阿董據理再次提出政制改革報告？
高官犯錯，毋須問責落台，就係「經一事、長一智」、「問責唔一定要辭職」，卒之捱唔住要落台嘞，又係「回應民意」，咁嘅「施政」，又真係改善咗唔少喎。
傳真︰2623-9278
電郵︰