成龍個仔房祖名噚晚喺中環出席加盟英皇唱片記者會，佢九月會推出國語專輯，李宗盛、吳彥祖同葉蒨文（沙麗）等都有撐場。
祖名先喺台上攞住結他自彈自唱，原來李宗盛係佢嘅歌唱老師，祖名話一日為師，終身當李宗盛係老竇。原來有次李宗盛喺錄音室鬧祖名唱歌唱得唔好，但之後又攬住錫番佢，祖名話自己當時好感動，但一直忍住眼淚。
沙麗爆祖名喺七歲時曾講過要娶佢為妻，後來祖名認咗沙麗做契媽，沙麗講笑話：「我有時聽見佢同女仔傾電話都好難受，我畀佢嘅入行貼士係唔好吸毒同飲酒，可以出夜街，但唔可以去蒲，唔准俾狗仔隊追。」
問到祖名同女仔傾電話，對方係咪緋聞女友鍾欣桐（阿嬌）？佢話：「拍完戲之後，我都冇同阿嬌聯絡。」
此外，房祖名媽咪林鳳嬌噚晚同陳自強去中環連卡佛購物，然後佢都有出席祖名嘅簽約活動，因為佢好怕俾傳媒影相，所以聽祖名唱咗三首歌，佢就好低調咁喺後門走咗。
台灣名模林志玲噚日以古希臘雅典女神造型，喺台灣出席浪琴表記者會，林志玲嘅出現令浪琴表總裁大為讚歎，更忍唔住「嘩」咗兩聲，佢重特別送咗一隻價值兩萬幾蚊嘅圓形鑽表畀林志玲。
徐子淇最近緋聞不絕，佢除咗俾人踢爆同霍震霆個仔霍啟山拍過拖，近排又傳佢即將開嘅時裝店係富豪李兆基個仔李家誠打本畀佢，馮仁昭噚日打畀子淇，佢話：「我睇完報道好唔開心，間舖頭係我畀錢同朋友夾份，咁樣寫對我同我朋友，重有我屋企人好唔公平，李家誠係我嘅家人嘅朋友，一早就識，至於有冇發展機會，呢啲嘢要順其自然。」
雷頌德（Mark）噚日出席音樂會記招，對於張燊悅公開話會追番自己，Mark就話女方只係講笑。佢亦好坦白咁話同張燊悅係朋友，重不時有聯絡。不過Mark自從甩拖之後，生活就冇張燊悅咁精采。Mark話：「我從來都冇乜追人，怕圈中人貪慕虛榮？做我哋呢行貪慕虛榮係啱嘅，咁先有推動力。」
今年年頭嗰陣，金城武去咗柬埔寨幫馬來西亞石油公司「Petrona」拍廣告，金城武揸住架保時捷開篷車同電單車展開追逐，重借咗架火車嚟拍，製作費用咗成千萬港紙，但係馬來西亞政府以當地交通意外多、廣告太暴力為理由，禁播呢個廣告，廣告公司惟有重新剪接，希望可以符合當局嘅要求。
