外圍股市雖然不振，但港股連續幾日都能夠先跌後升，表現硬朗，噚日恒指曾落到12166，跌118點，但中段已上番，結果收12320，升36點，成交去到144億元。大市既能扭轉跌勢及倒升，且交投大增，證明市底確係好強，中期仍可以13500至14000為上升目標。期指收12347，高水27點。
近日美股表現確實令人憂慮，市場充斥着大公司被降級的論調，好似雅虎同英特爾都被人睇淡；不過，若然大公司嘅業績並唔係咁差，而前景展望都算正面嘅話，則已跌定等消息嘅美股，好大機會造番好，正如港股在上月24日大升313點，將形勢完全扭轉過來一樣。當然，現時美股受太多唔明朗因素影響，但要留意佢止跌回升、扭轉淡勢之時，港股肯定會挾番鋪勁嘅。
噚日早段跌市，唔少人沽貨，特別係國企，但大行亦擺定個陣勢，係咁接到下晝，佢哋買貨嘅矛頭，由國企轉而向地產股，結果大部份地產股都有幾個位進帳，長實（001）重上60元大關，新地（016）升0.75元，收租股希慎（014）同鷹君（041）繼續有大盤扯吸，新世界發展（017）尾段亦搶上6.30元高收，升4.1%。
近日地產股嘅升浪，表現最勁係鷹君，由10.6元升到最高的14.2元，升幅34%；希慎由11元升上13.9元，升幅26.4%；新世界則由5.1元升上6.35元，升24.5%。
3股之中，新世界升幅最細，但股價折讓則最大，達到53.5%，而鷹君同希慎分別為41.5%同27.3%。新世界每股資產淨值13.5元，以折讓40%計，股價已可見8.1元。大行多看好本港地產股前景，新世界目標價由8.8元至11元不等。
新世界連升3日，走勢剛突破大型頭肩底的頸線阻力，而10日線已升破20日線，下周重會升破50日線，中期上升大浪確認，以量度升幅計，初步目標指向8元，亦即4月初的高位水平。
細價股方面，佑威（627）旗形整固一日，又再升過，短線可向0.52元推進，中線目標0.56元。彩星集團（635）好強，噚日低試1.05元後就快步回升，若升破1.13元阻力，最少可見1.4元。
郭兆誠