兗煤（1171）噚日停牌配售1.53億新股，配股價每股8.30元，折讓10.3%，如果連埋隻「綠鞋」，抽水金額可高達17億元，用於收購煤礦及甲醇廠房。消息未有令市場擔心出現國企抽水潮，大市先跌後回升，收報12320，升36點。
粵啤（124）澄清無意出售股權後，股價回吐14.8%至2.30元。青島啤（168）亦跌0.7%，收7.10元。7月15日是青啤100周年慶典，會邀請財經界及傳媒北上睇廠，未知會否有好消息跟尾？
青啤百年慶典，引起投資者憧憬公司會有慷慨派送，不過公司過去一段日子不斷進行收購，使咗唔少錢，重有冇餘力大派高息，實在令人懷疑。
中原地產話上半年佣金超標，達到8.24億元，決定向後勤員工發1/4個月花紅。據聞美聯（1200）都唔執輸，聲稱因「上半年業績報捷，冠絕全行」，所以明日在會展開大會犒賞三軍，到時唔知會否露口風，講吓上半年業績呢？美聯噚日升6.4%，收1.84元，成個開車格局，應該追得過。
東大照明（8229）周一股價曾急挫74%，當晚公司即澄清主席冇押股兼公司財政穩健，周二股價大幅反彈，點知噚日突然停牌，聽聞有股價敏感消息宣布。據聞東大照明原定於6月29日公布業績，後來押後至7月29日，其間傳聞唔少，加上近日股價波動，可能需要向外界交代清楚，才可以復牌。如此一停，先前入市博反彈的投機客，可能有得震冇得瞓。
阿虎