隔晚美股唔掂，昨早日股又非常麻麻（指數曾跌224點），咁嘅環境之下，港股應該冇運行，恒指又的確散過118點，最後反為有進帳36點。期指更厲害，最低12100，彈上12347埋單，低位起計彈幅247點。咁嘅現象，話明市底夠惡，只要外圍定得住，港股分分鐘彈跳幾百點。
港府前日宣布，第二類互連政策檢討完結，規管措施至08年6月全面撤銷。啲技術性嘅嘢，睇唔明嘅人多過睇得明。電盈（008）滿意，肯收貨，即係代表撤銷規管之舉，對電盈有利，股價有反應，收5.55元，升15仙，成交量由前市嘅4.9球大增至23.8球，增幅近4倍。
電盈既然有好嘢，交投又配合，個勢繼續靚靚，搵Call輪炒，吼9762呢件鎖定回報輪可也。9762前日31球成交，昨日236球，收18仙，升得2%，未跟得貼，正股升幅重大過佢。
個市底硬靜，滙控（005）都會有運行。滙控下月2日宣布中期業績，分分鐘到咗派半年成績表之時，股價由𠵱家116元上到120元過外，幅度唔算大，但啲Call輪升幅就唔係咁計，因為有槓桿效應。容易炒賣，數據又靚，始終要隻9783，9月尾到期，溢價1.1%，槓桿率15.9倍。正股升4元計，去到尾隻輪冇晒溢價，升幅係4成半，有可能係和味輪也。隻輪昨日收73仙，同正股一樣，冇升冇跌。
章盛