老董平時乜都攬上身，但今次咁「果斷」接受小強請辭，唔知係咪朝頭早個雷太勁，連老董都劈得醒。早喺小強未請辭前幾粒鐘，就連保皇黨都爭相提修訂沙士報告議案，一齊「倒楊」，甚至連身在北京嘅劉漢銓，都慌死執輸，打長途電話返香港叫朱幼麟出手，加入「倒楊」行動，好令八方質疑，保皇黨係咪事先收到風？
民主黨肥仔明和自由黨田少都話事前冇聽到乜嘢。民建聯方面，有人話畀八方知，陳鑑林前兩日高調話要楊「引咎辭職」，返到去結果俾前主席曾鈺成片到七彩，估計民建聯都未必收到風。
不過，大概只有小強同老董咁天真，以為班議員會放佢一馬，係人都知個委員會成立嘅目的就係要人頭落地，落實問責制。
小強唔撈之後，董班子醫生幫得番李國章同何志平。唔知李局長係無情、定係要掩飾心中嘅悲痛，八方問佢感唔感到可惜，佢一粒字都唔答，又唔講自己係咪會接小強個位，就以九秒九嘅速度離開立法會衝入座駕。
（圖）李國章冇講係咪會接小強個位。
傳真︰2623-9278
電郵︰