大狀L幾年前考到大律師資格後，唔做教授，離開山水共一色嘅美麗校舍，跑到石屎森林，迎接市場挑戰，真勇氣可嘉也。久唔久就喺大馬路碰到佢，每次佢梗係右手揸公事皮包（大律師、律師嘅公事包特別大，用嚟裝大量文件），左手揸本好似字典咁厚嘅書。大狀L自大學時代起，就書不離手，數十年如一日，手揸厚書，成為佢嘅生招牌。
呢日成班人食完午飯，行落雲咸街，見到對面一位白頭仁兄右手揸公事包，左手揸書，雖然只睇到背影，眾人已經肯定呢位就係大狀L。老友N話：「大狀L嘅師傅係艾勤賢，夠晒出名。」聽佢講，呢位艾勤賢夠晒巴閉，曾經做過巴布亞新幾內亞（即係鍾尚志教授捨香港而投身之地）嘅律政司、香港律政署高官，老友N做靚仔學師嗰陣，艾勤賢已經代表政府控告嫌疑犯，喺高等法院表演功架。律師N話：「啲警察見到佢都有啲震，因為艾勤賢經驗豐富，冇經驗嘅警察上庭作證，俾艾大狀盤問，隨時出醜出錯。」
有時覺得畀律師費非常肉痛，但冇大狀辯護，可能好吃虧。你睇吓，史科菲騎「獵勝名駒」，俾馬會停牌六個月，睇白喺香港玩完。點知佢搵艾勤賢代表上訴，居然死都打翻生，馬會上訴委員會經七小時商議，判史科菲上訴得直，取消停牌，而且重發牌畀佢做下季全季公司騎師㖭。唔知艾勤賢收幾多律師費呢？無論幾多，相信史科菲一定話：抵抵抵。
艾勤賢最叻獲選做FCC（外國記者會）嘅理事兼第二副主席。FCC最近請咗前麗晶酒店嘅老師傅做行政總廚，中西菜式大有進步，大家試吓就知。