人要有自知之明，好似前英格蘭國家隊同熱刺領隊荷杜咁，無端白事走去自薦做法國國家隊教練，搞到俾人寸，真係攞架嚟丟。
法國足總日前話收到荷杜自薦做佢哋國家隊教練嘅傳真，但因為佢哋主席施蒙尼去咗公幹，所以要等佢返嚟先畀到回覆荷杜。不過法國職業足球會公會發言人麥杜就好唔畀面咁講：「雖然希臘由一個德國人（列哈格）帶領下攞咗歐國盃，但我認為荷杜應該冇行。」
我求大俠雖則認同機會係自己爭取返嚟，但係荷杜自從喺去年九月俾英超球會熱刺炒咗之後，量地量到𠵱家；最慘就係，佢之前教英格蘭國家隊，又一啲成績都冇。
高比拜恩喺今嗰夏季嘅自由身市場都可謂呼風喚雨，湖人為咗要留住佢，一早踢走咗教練積遜，連老大奧尼爾都讓路要求走人，湖人跟住重不惜重金向杜克大學挖角，想拉攏高比仔欽點嘅K教練過檔，點知高比仔依然唔領情，噚日重走咗去金塊參觀，認真係黃帝女唔憂嫁囉！
英超聯球會愛華頓噚日宣布，佢哋同泰國一間啤酒公司簽咗一份價值一百五十萬鎊（約二千一百六十萬港幣）嘅一年贊助合約。愛華頓之前同中國一間電訊公司簽贊助合約成功打入大陸市場，呢期就靠同泰國啤酒商合作而進軍東南亞市場；佢哋咁有生意頭腦，我求大俠真係佩服！佩服！
獲愛華頓提供一份周薪五萬鎊（約七萬二千港元）五年合約嘅朗尼，日前爆響口話自己喺十二歲嗰陣時踢龍門，重話自己打得唔錯，不過佢鍾意踢前鋒多啲，於是就向呢個位置發展。話時話，如果呢位神童當日向守門員發展，話唔埋𠵱家幫英格蘭守龍門嘅，經已唔係占士。
希臘攞咗今屆歐國盃後班球員做埋國家英雄，於是敢行出嚟為自己爭取，卡索蘭尼斯同卡錫斯就要求佢哋效力嘅球會雅典AEK，立即清咗欠落佢哋嗰七十五萬三千四百歐元（約七百二十六萬港幣）人工。佢哋追唔返條數亦唔使愁，事關佢哋上晒位，有望過四大聯賽掘金。