先科國際（724）又再批股集資，今次竟然搵到金手指呢位大隻佬入股，真係令小初異常佩服。經紀陳話，聽講幕後人等今次士氣高漲，股價重有排去咁講。
受到金手指入股消息刺激，先科噚日高見1.56元，收報1.52元，升4.8%，成交股數2578萬股，金額3496萬元。
先科今次批股集資分兩方面，首先以先舊後新方式，每股1.30元，配售1900萬股；另外向惠理基金發行金額2587萬元可換股票據，行使價同樣係1.30元，集資總額5057萬元。噚日成交25球貨中，扣去19球配股上板，查實成交股數只係6球多啲，計落獲利沽盤唔算多，所以經紀陳話隻股未炒完，睇嚟唔係亂咁講。
另外，最近經常勁sell納米概念嘅佑威國際（627），將於7月12日公布業績。
經紀陳話，業績應該冇問題，盈利一定有增長。佑威噚日成交大增，但股價只係升2.2%，收0.465元，成交股數2510萬股，金額1149萬元。
慕容小初