資深嘅動畫迷一定記得《鐵人28號》呢套經典卡通，由名漫畫家橫山光輝於1956年發表，可謂機械人動畫嘅始祖，雖然動作唔似得高達系列咁多變化，但簡簡單單又能深入民心；最近鐵人28更來個大翻新，新一輯動畫即將於日本播出，同時《鐵人28號》遊戲亦會於PS2上登場，各位鐵人Fans，又可重新體驗大巨人鐵人28號嘅威力，為正義而戰！
記者：許福合
如果閣下對日本動漫認識有番咁上下年資，應該對故事背景不會感到陌生；故事發生在第二次世界大戰結束後十年，日本正處於戰後復甦階段，主角少年金田正太郎，成為由父親金田博士所開發巨大機械人「28號」嘅操作員，與邪惡勢力Ｘ集團作戰。
鐵人28號雖然係機械人，不過就冇咩高科技武器，真係俗語所謂「單靠一雙鐵拳打出天下」！不過打落又唔係全無變化嘅，因為28號還有一些貯氣招式，威力比普通攻擊大好多，而且還會有轟飛同倒下的效果，場面可謂想當震撼！但由於遊戲有「氣量計」的設置，所以一定要慳住用！
至於另一常用技為「投擲」，基本畫面上大家所見到嘅嘢都可以掟！大至房屋，細至人類，都可以一手拎起，周圍掟！投擲房屋威力更可以比得上必殺技呢！不過當呢場城巿保衞戰完結後，城巿將變成一片廢墟，夷為平地，究竟係保衞定破壞，真係見仁見智。
其實遊戲內除咗要求戰鬥技巧外，更極度考驗玩家方向感，因為操作將會模仿漫畫操作模式，玩家要控制鐵人28號時，若跑到太遠，或被建築物遮掩，加上畫面設有景深元素，操作難度大增，呢個時候就可按「Select」切換至主角操控（金田正太郎），主角就會收起遙控器，自由走動，不過因為主角唔識飛，要喺地上慢慢走動，而且鐵人28號脫離玩家控制後，並唔會作出反擊，如何將主角放喺安全而適當位置，將會成為致勝關鍵，另外左右上角均會不時出現己方或敵方說話，雖然都幾煩，不過己方會喺適當時候發出提示，唔夠打嘅時候就要多加留意。
遊戲內分別提供3種玩法，最好玩都要數故事模式，既係由淺入深，而且每過一關，都可以累積點數，用以改善升級機械人嘅性能，若果有足夠點數，更可以學習新嘅必殺技，對後期作戰非常重要。
至於挑戰模式更設有多達60個不同關卡，考驗玩家嘅技術，雖然欠缺故事性，但勝在夠爽！另一個對戰模式亦相當值得推介──協力作戰模式，機械人可以自由選擇，不過就先要喺故事勝出機械人才可使用，因為機械人移動速度慢，加上敵人數量較多，雙人作戰更講求合作，與單打技巧完全唔同，相信可適合唔同玩家嘅口味。
遊戲資料
開發公司：BANDAI
類型：動作
(C)BANDAI2004