經紀黃早前品題過理文造紙（2314）同埋造手袋嘅理文集團（746），噚日兩股公布全年業績，一如佢所料，理文造紙表現較佳，盈利上升34%，賺2.85億元；理文集團雖然都賺成1.02億元，但就比起去年下跌11.7%，兩隻理文在公布業績後則齊齊跌。
理文造紙噚日最低見6.40元，但臨近收市時抽番上去6.95元，跌唔夠1%，至於理文集團就大跌7.14%，收1.04元。
以兩股噚日表現，似乎有投資者趁消息出貨，但鍾情理文造紙嘅經紀黃就力撐到底，話市場對紙品需求仍然強勁，如果公司能及時增加產能，中長線仍可以睇好，其實只要睇見理文造紙估計明年資本開支預算有成8.4億元，就知公司係好進取。
另外，噚日粵海啤酒（124）無厘頭勁升33.3%，收2.70元。粵啤勁升，惹來有外資欲入股的揣測，但據講公司已經否認。經紀黃話，與其睇粵啤不如睇粵海投資（270）好過，皆因早幾個月前，江湖曾傳聞佢有意批股集資減債，家陣市況好轉，隨時會否舊事重提，股價有望造好。
慕容小初