汽車專題：<br>收藏舊車等升值平治癡見好就收

汽車專題：
收藏舊車等升值平治癡見好就收

不用見面，淨聽個名都知他最鍾意Benz，皆因他的英文名字就叫做MercedesWong，現實生活中他又真的養了9架Benz房車，不過卻像個收買佬，專門收集一些別人嫌舊嫌殘的舊Benz型號。別人嫌棄，他卻覺得Benz房車大大架坐得人多又舒服，「用幾萬蚊甚至只係幾千蚊就有架二手名牌歐洲車，幾抵呀?!」

記者：曾順珍　攝影：黃子偉

80/90年代車隨時升值
Mercedes工作繁忙，訪問期間手電響個不停，這個家住港島南區獨立式洋房的大男人，平日以做汽車買賣為主，因而對Benz情有獨鍾，他自言錢銀不多，所以便收藏舊年份房車來「頂癮」。
「我自己做車行，當然唔會買新車，因為新車賣出去會蝕好多，就好似升降機一樣跌得好緊要，買二手車就抵好多。
咁多種車中Benz就最好Keep㗎啦，因為零件多，識維修嘅師傅又多，加上車價貴，車主一定會保養得好，所以殘極有限。有時遇到好舊嘅車，用幾萬蚊翻新內櫳就得。最好Keep嘅係80/90年代嘅車，因為無人要，價錢又唔高，如果我Keep得好，過十年八年，分分鐘會升值。」

■Mercedes本身攻讀政治，畢業後幫父親做建築生意，後來覺得建築業經常被人拖數，於是轉做汽車買賣。

入貨2大條件：口碑好又Classic
為了要Keep到心目中的舊型號，他發散行家「放行風」，只要有賣不出的舊Benz或即將被劏的，如果型號適合價錢又合理的，他都會買下。有時行過街見到喜愛的車，他會把名片留在車的擋風玻璃前，叫車主想賣的可以向他出價。近期他就看中鄰居的一架69-74年3.0CSi型號，游說了車主好幾次，別人始終不肯賣，但Mercedes稱不會放棄。
「我會睇型號而買車，盡量買啲口碑好又Classic嘅一類，試過有行家以$8,000賣一架89年嘅300SE畀我，架車好企理，毋須要做大維修，我覺得好抵；亦有人以十幾萬賣一架67年嘅280SL，但我覺得唔值，所以最後都無買到。」

「別人笑我太瘋癲」
幸好Mercedes自己做車行，可以用一個最低開支養9部Benz，不然，以他每部車都擁有最少十年車齡來計，單是汽車牌費保險，每年費用就高達十多萬。
「因為我自己做車行，所以本身就有試車保，唔需要為每部車畀保費，而且我唔會為每部車年年續牌，如果行車證過期，只要掛上T牌就可以喺街上行。𠵱家我每個月嘅維修費大約要兩萬蚊，好在舊車較少電子配件，壞嘅機會較少……人哋點話我？咪話我黐線咯，Keep咁多部車，但我每部車都會輪流揸，我真係會用嚟代步㗎！」
真係咪睇小這類舊車，好似Mercedes話齋，全部都係當年有錢佬揸嘅車，幾威呀！