波鞋Guide：期望新季波鞋百花齊放

隨住NBA球季結束，筆者喺呢度嘅專欄會暫時休業；今期我會講講上季的NBA的波鞋事，作為一個完美的總結！
○三至○四年籃球鞋市道可以講係幾慘，個人型號：如Answer7、T-mac3、VC3等全部谷唔起，勒邦占士的AirZoomGeneration銷量亦比預計中差；佐敦十九白色因為來貨少所以好啲，不過佐敦牌的復刻款比新款好賣已經變成特色！嚟緊鄧肯的Dcool、安東尼的AirJordan1.5同姚明嘅新鞋款都會加入戰場，希望百花齊放會令市道好啲。

球星戰鞋全部谷唔起
非個人型號中，今年有幾個款我好鍾意，分別係SuperstarUltra、Huarache2K4、ATRReload、Jordanteamflow同Risemid；無論外形到舒適度都十分討好，NBA中亦有不少球員穿着，如果唔鍾意球星個人型號，大可一試。
科技方面，好似已經冇乜進步，只係一味鬥輕。其實避震系統係咪已經去到盡呢？反而玩花巧似係大勢所趨，睇下DADA的「風車鞋」、甚至佐敦二十同占士二代用到雷射雕刻就知；所以我更期待adidas的記憶晶片（記低你每步所需嘅氣壓然後作出調節）跑鞋同reebok的pumpfury2.0，可以知道運動鞋科技推到去邊。
嚟緊運動鞋戰場會係雅典奧運，美國籃球代表隊嘅戰鞋將會十分矚目，好似T-Mac3.5奧運版早早推出，但係T-Mac又唔打，真係經典；其他巨星扭扭擰擰，令美國籃總同波鞋生產商都十分尷尬。

拉利莊遜復刻戰鞋正
連載咗三十四篇，係時候放吓假充充電，以十足狀態迎接下季；最後想同大家介紹「星牌」復刻咗前黃蜂同紐約人球星「BigL」拉利莊遜九三年所着嘅AeroJam，正到痹！讀者們，後會有期！
Hleung-波鞋網站www.hk-kicks.com 頭目，最愛佐敦同柏賓，最怕寫字。
Email:[email protected]