新地馬灣珀麗灣三期，是上月市場熱賣新盤，令二手市場受壓，成交減少。最近珀麗三期銷售告一段落，二手開始有起色，部份業主即時趁勢賣樓。
利嘉閣青衣城分行經理李傑華表示，珀麗灣十五座低層E室業主，○二年以一手價一百三十四萬買入單位，住咗一陣就移民，原本諗住保留單位作度假用途，最近返港，突然改變主意，將單位放售，最後以一百七十八萬成交，單位面積六百八十八呎，每方呎二千五百八十七蚊。
李傑華指出，呎價比市價低一成，但計埋單位屬低層，質素一般，實際冇乜平。
現時珀麗灣一至三期共有三百個放盤，一及二期佔二百個，叫價每方呎三千五六。本月至今就有六宗二手成交。
豪宅市道保持平穩，華業（控股）的摩星嶺道御海園，上個禮拜攞到售樓紙後，隨即推出小量單位測試反應。噚日市場就流傳一張有六個單位嘅價單，全部為分層單位，由一千四百三十呎至一千七百六十六呎，定價一千二百九十二萬起，呎價最平都要九千零三十五蚊。另外，有個二千二百五十三方呎複式單位，定價二千一百六十二萬，呎價成九千五百九十六蚊。
至於獨立洋房就未見有定價，市場就講，由於該區少有同類新供應，而且又有海景，相信唔憂賣。
地產市場愈來愈娛樂化，好似一向鍾意扮鬼扮馬的長實執行董事趙國雄，扮過的造型多不勝數，早前記協聚會，就上台扮一代歌王「貓王」。
噚晚中原地產慶祝今年上半年業績豐收，執行董事陳永傑，唔知係咪受趙國雄的表演慾感染，扮本地歌神許冠傑，扮相維肖維妙，重上台唱三首歌，其中一首係繼續微笑，寓意各位同業，無論市道旺淡，都要保持微笑。
唔怪得中原上下員工成日都笑口常開。
投資者狙擊商舖，只要人流多，就連偏遠嘅元朗區都唔放過。卓先就剛替一東南亞資金，以約四千五百萬蚊標價，擊敗另外十一個標客，包括小型發展商，向中銀香港買入青山公路一一一至一一三號，近開心廣場一個五十幾年歷史四層老舖（圖四），以實用面積約六千二百呎計算，每呎大約七千二百六十元。
個舖由張毛記電器以每月十五萬五千租用，租期至明年三月，回報率四厘一，不算高，但勝在有重建價值，佔地約二千二百呎，補地價後可發展約三萬三千呎，每呎樓面地價大約千四。
大集團或名牌子，梗係容易招徠客戶，但係若果兩樣都冇，都唔使太悲觀，只要肯動腦筋諗計，分分鐘可以獲得相同效果。
永常集團西環卑路乍街再輝大廈舖位，現正招租，為咗增加吸引力，業主喺廣告中提到，舖位左面有寶翠園，右面有綠意居，呢兩個都係優質樓盤，拉埋嚟講，係咪覺得好有商機呢！
廣告重話，舖位正對百佳超級廣場，同毗鄰寶翠園惠康超級廣場，暗示人流應該有一定保證。
個舖逾六千呎，叫租六萬八，每呎十一個三。
蘭西
電郵地址：
