大市反覆造好，恒指升31點，藍籌股以地產類較出色，國企則仍然係追捧對象，國指收4404，升54點，大市成交增至128億元，其中國企佔34億元，比上日大增62%。
國企以資源股最強勢，化工類則在高位整固，遲早又會輪到。江西銅（358）表現最突出，午後搶上3.975元，收3.925元，大升7.5%，大行重係一路咁買；記得早個禮拜，當時江銅股價重係在3.4至3.5元水平，已經睇見大行係咁收集，買盤前仆後繼，「球球」聲咁買，肯定係有料到啦。果然一個禮拜，股價就升咗十幾個巴仙，噚日成交重大增到2億元。國企今個升市，江銅係最勁一隻，由低位2.05元上到3.975元，升幅93.9%！
3隻鋼鐵股繼續上，以鞍鋼（347）最靚，收3.125元，升5%，重鋼（1053）同馬鋼（323）則有2.4%同1.9%進帳。由低位起計，到噚日高位，重鋼升52.9%，馬鋼升53.4%，而鞍鋼則升56.8%。至於中國東方（581），由低位1.07元升到1.54元，升幅只係43.9%，落後幾隻鋼鐵股，更俾江銅遠遠拋離。
幾隻資源股嘅走勢早已破位而上，中國東方則到噚日先突破，升破個多月來的頭肩底及50日線（同在1.5元水平）阻力，且有大成交支持，照度上去，短期目標指向1.8元。
相比其他鋼鐵股，中國東方現價確係好偏低，往績PE只係3.2倍。今年3月，上市價2.75元，最高價3.65元，現價比上市價仍低44.3%。
鋼鐵業受宏調影響，產品價格已下跌2至3成，但生產原料鐵礦砂跌價幅度更大，影響程度不如想像的深，同時，業界已預料下半年鋼材價格會逐步回穩，鋼鐵業的盈利，相信仍會有微幅的增長。
保守估計中國東方04年（12月年結）盈利11億元人民幣，微升2.2%，每股盈利0.415元人民幣（已就發行新股作出調整），預測PE只係3.9倍，即使股價升上1.8元，PE亦只係4.6倍！
其他資源股如兗州煤（1171）同安徽海螺（914）個勢都好靚，前者收9.25元，升5.1%，後者9.35元，升3.8%，兩者短期目標價都指向10元。
郭兆誠