中央政策組全職顧問練乙錚，因與董班子不合，尤其因為講良心說話，得罪咗頭頭劉兆佳，於是就遭到解聘炒魷，被迫令「提早放假」，白收多四個月人工，然後執包袱走人！
可憐練乙錚本來係科大經濟教授，諗住「書生報國」，首先去咗某知識分子報紙做老總，跟住覺得抱負都重係未能舒展，喺特區政府一小撮混吉人士甜言蜜語之下，以為「加入建制」，可以提出「建設性批評」，點知一入太監大本營，練乙錚從來冇諗過揮劍自宮，入到去重諗住履行正常男性嘅生理功能（睇佢做咗智囊之後，啲鬍鬚重生得咁密就知）：講老實說話，對得住良心，咁又點會唔遭到太監聯手排斥放逐？
練乙錚做咗顧問，重附和倒董，重走去參加六四燭光會。佢又唔學吓劉兆佳，未做「首席顧問」時，夠一樣口窒窒咁刻薄攻擊阿董，一「加入建制」，就口窒窒變咗舔董急先鋒。練乙錚練嚟練去，話之你練琴、練箏、練刀練劍，獨係練少咗一味葵花寶典，咁就遭到清場。
一個學者兼教授，又博士又乜，到處受尊重，捱到幾十歲，喺事業上，贏得一項「開除」嘅紀錄，對於一個金榜題名嘅讀書人，你話係幾大侮辱？
同樣係學者，都係關信基教授精啲。人哋留學德國，喺思想上早已國際化，拒絕加入中國式太監集團。阿董反為流晒口水，委任佢做假大空嘅「加強社會凝聚力小組」頭目。點知關信基睇穿呢個「執政聯盟」一早散晒，社會凝聚力，喺晒7.1大遊行嘅市民人心嗰一邊，敷衍佢兩嘢，走都走唔切，嗱，𠵱家人哋就毋須孭住「解聘」兩個字返回大學校園咯喎。
願意上賊船，就預咗好快玩完，除非自己都做埋賊。練乙錚只不過畀幾句諍言意見，咁就要炒魷，嘿，不過沙士孭足三百條人命嘅楊永強醫療庸官集團，就經一事長一智，一個都唔使炒喎。沙士受難人郭名慧父親郭善雄激到打電話上電台，大鬧「厚顏無恥」，真正無恥嘅係呢個是非不分嘅政府。
沙士報告書出籠，土共喉舌開足馬力，搏命嗌「問責唔等同一定要辭職」，練乙錚六四燭光走去沉思坐咗幾粒鐘，盡一個中國人起碼嘅良心責任，就遭到排斥放逐。呢亭政府，講一千次「承諾改善施政」，你會唔會信？
傳真︰2623-9278
電郵︰