查列斯迪斯喺歐國盃決賽嘅頭槌入球，唔單止幫希臘成為冠軍，重令佢喺雲達不來梅由配角變做主角。
不來梅經已喺上星期四開操，以準備下月六號展開嘅德甲聯；而有份踢歐國盃嘅球員好似麥連、包文、高路斯同卡斯歷等亦陸續歸隊，惟獨查列斯迪斯例外，可以唞耐啲，喺七月尾先返球會操練。
不來梅肯咁做，原因係唔想查列斯迪斯俾歐國盃搞到殘晒，寧願等佢唞夠先至返嚟。佢哋經理K阿羅夫斯就咁話：「如果查列斯迪斯喺來屆可踢出喺歐國盃嘅水準，佢喺球隊嘅角色就好重要。」
記得查列斯迪斯上屆喺不來梅只係後備，𠵱家佢做咗國家英雄，梗係得到不來梅重用啦！但新加盟嘅高路斯就慘，佢原本諗住嚟不來梅頂艾列頓個位，估唔到嚟緊要同卡斯歷爭正選，重由主角變咗做配角。
查柏東尼執教賓菲加，怕且都會好似波圖嘅意大利籍教練迪利尼一樣，搵幾件聽使嘅鄉里加盟。意國傳媒盛傳老查嘅羅致目標水蛇春咁長，包括當年費倫天拿麾下舊將C阿武羅素、阿丹尼同埋高斯等等。當中大部份近年失意於意甲，如果屬實，老查教賓菲加都算係發霉球員嘅喜訊囉。
阿根廷前鋒基斯普前日玩失蹤，唔出席車路士新一季首課練習，而車仔新領隊摩連奴亦不甘示弱，唔使佢參加本月較後時間嘅美國之旅；基斯普咁夠吉士同摩連奴玩嘢，睇嚟佢喺車仔都係咁先。另外，荷蘭中場戴維斯肯定去唔到車仔；點解？皆因摩連奴話佢身高唔過一米七，生得太矮喎。
朗尼話唔係練習就係比賽，冇時間同啲朋友去玩，所以話曾諗過放棄足球，過返啲正常人嘅生活。但我求大俠覺得食得鹹魚抵得渴，朗尼要出名同賺大錢，犧牲某啲嘢係在所難免。話時話，朗尼最近好撐碧咸，話之前都喺盧斯球場射過十二碼，一樣一飛衝天，佢咁世界仔，真係抵佢紅！
舒拉寶娃捧走溫布頓后冠後，鬼咁隱晦話要多謝一個人，以為佢暗示有心上人，即時令好多男球迷心碎。但經傳媒明查暗訪後，原來佢講嘅人係一位喺紐約家財千萬已婚男士費沙。已有兩子嘅費沙原來喺舒拉寶娃成名前扶助佢唔少，當佢女一樣，兩家人感情好好。咁男球迷可以飲得杯落啦！