劉德華將於九月一號至十三號喺紅館開十三場個唱，馮仁昭聽聞如無意外華仔會加開兩場，而華仔喺香港開完之後就會即刻返內地開十二場巡迴演唱會，到時真係有排佢忙。講到華仔香港個唱嘅門票，今個星期五就公開發售，由於內部認購一早爆滿，所以估計公開發售當日都會掀起撲飛熱潮。
另外，原來華仔、金城武同章子怡拍《十面埋伏》時都吃盡苦頭，事關其中一場戲係講華仔同金城武俾敵人五花大綁，綁足幾個鐘，由於工作人員用粗繩綁佢哋嗰陣綁得太實，搞到佢哋幾乎唞唔到氣，腰痠骨痛，多次要求工作人員鬆吓繩。
章子怡雖然冇被五花大綁，但佢拍嗰場俾六個壯男追捕嘅戲份時，滋味都唔好受。六個男人揸住木棍追打章子怡，將佢個頭壓落去啲泥水度，而其中一個壯男更因為記錯對打招式，重差啲打中章子怡㖭！
王菲同張震近日接受雜誌《Vogue》訪問，兩人近來合作過電影《2046》，所以拍檔影相都好有默契。華語音樂傳媒頒獎典禮即將舉行，大會會頒發三十七個獎項，王菲同莫文蔚係「最佳女歌手」嘅熱門人選，王菲喺過去兩年都攞過呢個獎，如果今屆再攞就係三連冠，所以馮仁昭都覺得佢機會幾大。黃耀明同周杰倫分別有八項提名，都好威水吓。
劉嘉玲日前秘密去咗台灣三日，原來為咗拍一個房地產廣告，佢噚日已經拍完重離開台灣。據馮仁昭了解，佢喺個廣告裏面會以貴婦造型出現，咁樣先襯番間豪宅喎。馮仁昭又八到豪宅最平都要賣六百萬港紙，問到劉嘉玲嘅酬金，佢嘅經紀人陳寶旭透露：「據我所知，可能是最高的吧！」
at17、林一峰同黃凱芹噚日出席「第十六屆CASH流行曲創作大賽」活動，身為資深音樂人嘅向雪懷竟然唔係好識一班新人，將at17叫錯做Cookies。向雪懷話：「希望七大唱片公司可以將CASH歌唱比賽十首入圍歌輯錄成一張唱片，CASH就做發行。」
日前有報道話張燊悅𠝹九巴後人雷怡暉細佬雷永晃，張燊悅噚日話𠵱家仍然單身，重話喺外國讀書已經識得雷永晃，大家一直都係朋友，不過就冇單獨約會。張燊悅話佢唔怕是非，但報道講到啲女星入娛圈嘅目的係為嫁有錢人，就令佢好唔開心，張燊悅重話：「我有好多冇錢嘅朋友，佢哋又唔講？真係吹脹！」
