噚日喺一個宣傳商台懷舊節目嘅記者會上，主持人叫民政事務局局長何志平推介油麻地嘅「景點」，佢竟然好老實咁話，一定要參觀嗰度嘅公廁，因為老遠已經聞到陣陣「清香」，最具「香」港特色，局長咁坦白，唔知負責公廁衞生嘅部門收唔收到，冇理由到今日重咁清香。
自從何局長當年求得下下籤，何局長已經出晒名語出驚人，佢噚日自爆由細喺油麻地屋企附近嘅果欄同榕樹頭碌到大，喺嗰區留低咗唔少腳毛。佢重話自己最鍾意食用木桶載住嘅豆腐花，不過強調淨係可以喺日頭食，夜晚點解唔食得就冇講。雖然成日食豆腐花，不過佢細個嗰時都幾瘦，有相為證㖭。至於幾時搞到圓碌碌咁嘅身材，變咗做「肥平」，佢就冇交代清楚。
（圖）圓碌碌嘅何志平細個時都幾瘦，噚日就有人拎番佢六歲時（相中左）影嘅相出嚟做證。
傳真︰2623-9278
電郵︰