恒指升31點，個市屬於牛皮格局，但亦有唔少出色嘢，例如收租股希慎（014）、鷹君（041）與華置（127），升幅8%至9%。
九倉（004）都係收租股，收23.20元，升得1.1%。炒收租股之風若然繼續，九倉點都得益，九倉Call輪吼得過，正路之選係9086，11月到期，輪價0.55元，負溢價0.1%，槓桿率4.2倍。若嫌爆炸力唔多夠，則揀9516，明年3月到期，輪價18.6仙，槓桿率12.5倍，要畀高啲溢價，去到15.3%。想短炒，則揀鎖定回報輪9178，明年3月到期，輪價15.4仙，交投旺，易買易賣。
聯想（992）有啲勢，收2.20元，升5仙，交投由15球大增至24球。標準Call輪9845升11%，隻輪12月到期，輪價10.7仙，冇錯槓桿率20.6倍好爆炸，但溢價41%，你買埋我份。玩短線，吼9393，呢隻係平均結算輪，昨收18仙，明年1月到期，短炒唔使太過計較啲數據。
聯通（762）跑贏大市，收6.30元，進帳15仙。搵聯通Call輪炒，唔容易，多數嘅數據唔靚。交投最多嘅9844，勉強可以炒兩炒，但溢價好高，而壽命又唔太長，炒嘅話最緊要快手快腳。隻輪10月到期，溢價17.3%，槓桿率16.2倍。
地產股普遍硬淨，恒地（012）收33.70元，升20仙。恒地Call輪冇幾多可以揀，數據算係咁嘅有9037，年底到期，輪價65仙，溢價5.3%，槓桿率5.2倍，弊在冇乜成交。
章盛