七一遊行有幾多人上街，正一口同鼻拗，警方與港大精算家話有二十萬，《明報》用直升機影相，專家計出有二十六萬四千（未計中途插隊），民陣話有五十三萬。劉廼強在七月三日《南華早報》撰文話只得二十萬人（以警方數字計）上街，係一個「失望數字」，民主派冇贏到！
勿論幾多人都好，《明報》、《星島》、中大港大調查都顯示上街人士嘅五大特徵，就係：學歷好、年紀精壯、收入高、教育程度高、中產人士。無論甚麼知識分子報、中產階級報、暢銷報，向廣告公司推銷，都會吹牛：我哋嘅讀者收入高、教育好，係任何產品嘅目標客戶。
既然如此，一啲報紙一方面話代表中產，一方面就挺董、挺人大釋法，根本就係與目標讀者對着幹，令人莫名其妙，可能係老闆嘅政治取向凌駕於編輯記者之上，先至會造成報格分裂啩。
星期五下午六點半，與中環某報販講起七月一號報紙銷路，佢話：「梗係《蘋果》最好賣啦，一早賣清，但對手就剩紙剩到阿媽都唔認得。總之喺七月一號叫人唔好上街，潑冷水嘅報紙，銷路慘淡。」報販之言，證明意欲教訓讀者、影響讀者，以為自己係輿論領袖嘅報紙，未免自視過高。識得迎合讀者口味嘅報紙，銷路先至有保證。今天教育程度高、收入高嘅中產階級讀者嘅口味就係爭取民主！如果邊張報紙要迎合年紀大（五十五歲以上）、教育程度低（小學或以下）、收入低（未夠月薪一萬）嘅讀者群，不妨反民主支持曾憲梓。睇吓廣告商肯唔肯落廣告！（注意，以上讀者特徵，只係泛論，幸勿對號入座）。