立法會即將收爐，今日開始將會一連幾日進行馬拉松會議，將未審議嘅議案一次過搞掂，分分鐘開到星期六都唔完。
以往一開完會，班尊貴議員會即時飛去外地度假，不過今年係選舉年，想連任嘅就未必敢走，加上特首董建華下周二要去立法會出席答問大會，有客到，唔通班主人走晒咩。
特首點解揀一個咁差嘅日子？主要係佢答應過一年去立法會出席四次答問大會，佢老人家乜都慢幾拍，咪搞到立法會要加開會議，連惜別晚宴都要延期至下周二，唔怪得班議員有啲怨言。
不過阿董呢幾日心情十分靚，因為立法會沙士報告罕有地讚佢表現果斷，所以佢今朝早見二十二位民主派人士時，唔知會唔會有蓮子蓉咁嘅面口。
計吓數，舊年7.1五十萬人上街後，阿董冇幾耐就上京面聖，上星期副主席曾慶紅喺珠海傳聞見過澳門特首何厚鏵，但就冇見阿董，睇怕係時候佢老哥要交功課。
傳真︰2623-9278
電郵︰