英國靚仔男星祖迪羅（JudeLaw）近年喺電影圈發展有幾得大家有目共睹，而佢主演嘅作品今年會排住隊登場，其中以科幻電影《轟天戰士決戰明日世紀》最受各界注目。相信有份演出呢套戲嘅金像影后姬妮芙柏露（GwynethPaltrow）亦好期待，皆因佢之前拍嘅《頭等俏佳人》同《篇篇情意劫》都仆直，所以希望今次搭住《心計》舊拍檔祖迪羅重振聲威。
聲稱籌備超過十年嘅電影《轟》製作成本高達七千萬美元（約五億四千六百萬港元），成套戲好有cyberfeel，畫面夠晒虛幻。故事以一九三○年代紐約市為背景，當時全球嘅知名科學家突然失蹤，姬妮芙扮演嘅記者寶兒，就搵埋由祖迪羅飾演嘅天空隊長幫手追查真相，喺安琪蓮娜祖莉（AngelinaJolie）扮演嘅獨眼女船長協助下，揭發瘋狂博士進行嘅毀滅地球計劃，於是佢哋決定合力拯救世界。
呢部電影重有一個特別之處，就係除咗演員外，所有出現喺畫面嘅景物都係由電腦製作，演員只係喺一幅藍幕前面做戲，對佢哋嚟講係一個大考驗。而超現實嘅畫面加上機械人滿天飛嘅動作場面，真係令我羅拉諗番起《機動戰士》同《超時空要塞》呢啲日本動畫。另外，安琪蓮娜啱啱俾柬甫寨首相頒發公民身份，佢噚日重去咗當地出席記招。