林文龍及郭可盈兩夫婦近日為纖體食品拍攝廣告，齊齊搵真銀，兩人在拍攝時表現恩愛，由於該產品標明孕婦不能服用，故在一年內他們亦無生育打算。
林文龍及郭可盈最近以夫妻檔搵真銀，到西貢為纖體食品「纖悅」拍攝廣告，兩人首次以夫妻檔拍廣告，更成為該產品一年的代言人，問到林文龍夫妻上陣的酬金是否滿意？他表示財政方面全交由老婆處理，而郭可盈就說：「總之相當滿意，都係例牌價七位數字喇！」
對於老公林文龍將財政大權交給她，郭可盈說：「其實我哋都會一齊商量，啲錢點用都會通知對方，而且佢本身都好節儉，佢用錢比我重要理智，女人通常都鍾意shopping，佢只係會去踢波。」由於該產品標明孕婦不能服用，當問到兩人成為代言人後會否阻延生育大計，郭可盈說：「今年我哋都未有打算生BB，因為手頭上都有工作，係要生都幾年後喇，雖然老公想，但我自己重想做嘢，所以短期內都唔會生住。」
林文龍和郭可盈首次以夫妻檔拍廣告，埋位拍照時兩人表現恩愛，林文龍說：「兩個人係開心嘅，點拍都係咁恩愛，唔使刻意去扮。」而郭可盈就說：「其實今次我哋想畀觀眾睇到，我哋影出嚟啲硬照係真材實料，完全唔會經電腦做任何加工技術。」
採訪、攝影：王崇穎
