上個星期保坂尚輝為咗交代同高岡早紀離婚嘅事舉行記者會，喺席上佢怒罵同高岡鬼混過嘅音樂人布袋寅泰，又話要求佢公開道歉，雖然布袋發言人講過布袋唔會低頭，但原來呢個神高神大嘅音樂教父好細膽，一早就搵咗三個保鑣睇門口，驚死保坂上門尋仇。
高岡早紀同保坂尚輝離婚單嘢，外界嘅焦點已經落喺保坂同奸夫布袋寅泰嘅「沒有仁義之戰」。據聞布袋同保坂嘅生活背景好唔同，咪睇身高一點九米嘅布袋高過保坂一大截，但佢原來細膽又唔好打。
我大口羅拉自布袋喺樂隊Bo篤y嘅時候已經留意佢手結他好厲害，原來布袋係日本有名資本家嘅仔，細個嘅時候係學習古典鋼琴嘅書生，一向運動神經唔太發達，好似兩年前佢行路都跌穿個頭受重傷已經可見一斑。
相反保坂六歲嗰陣父母喺交通意外逝世，佢已經習慣喺逆境中求生，加埋佢細細個已經學習拳擊，發起火上嚟都咪話唔得人驚，唔怪得布袋聽到保坂發惡之後，即刻要搵三個保鑣幫手。
此外，和田秋子前日喺佢主持嘅節目中談到保坂：「佢嬲布袋都冇用㗎，對已經分開嘅妻子嘅外遇對象，要告都告唔入。」而事後保坂向和田發傳真話：「為各位帶來麻煩，非常抱歉。」
另有傳聞指高岡真正嘅奸夫唔係布袋寅泰，有人目擊到佢喺六本木夜會過氣男星加勢大周。