七月一日，五十三萬人上街遊行；人數超出預計，唔止民陣感到意外，相信負責監控嘅特首辦、中央政策組亦都嚇親。咁多人喺邊度走出嚟？
左丁山與成班人去中途插隊，行到滿頭大汗，全身濕透，減卡路里嘅效能，勝過做gym。就嚟行到中環之時，見到一隊拉起橫額——「香港大學法律學院」嘅大學生，猛咁嗌口號，後邊一條細路跟住嗌，嗌得好大聲㖭。港大法律學生大概已經嗌到攰，索性將口號紙畀咗條細路（似係小三小四學生），細路面無懼色，大步踏前，高呼「捍衞自由……」大學生跟着喺後面嗌，其他市民叫好，一位仁兄重話：「下一代有救咯……」
細路如此英勇，港大法律學生亦唔差。可惜佢哋嘅學生會（港大學生會）竟然贈慶，發表一份《七一救港宣言》，居然話：「縱然政府多番施政失誤，背離民意，但普選並不是一切事情的解決方法，盲目的追求，最後只會倒行逆施。培養良好公民質素，締造有利普選的社會環境，比白喊口號，白上街頭來得更有意義。」
乜嘢叫做「盲目的追求，最後只會倒行逆施」？唔通港大學生會上完北京之後，投入咗大師兄曾鈺成嘅陣營，唔理另外啲大師兄師姐李柱銘、湯家驊、吳靄儀、余若薇講乜？民陣蔡耀昌、職工盟李卓人亦係港大師兄，佢哋組織遊行，師弟喺後面放冷箭，冇話唔得，因為言論自由吖嘛，但佢哋講到盲目追求普選，倒行逆施，根本就係冇腦，港大學生之中，有頭腦、有識見嘅學生，快啲展開一場non-con（即對學生會提出不信任議案）學生會嘅辯論。