大市窄幅上落，恒指收市31點，成交則縮到只得91億元。不過，期指高水，升降指數繼續保持強勢，後市仍可看高一線。短期入市對象唔離國企同實力二三線股，噚日國企仍見有大盤收集，而細價股上升層面亦開始擴散。
彩星（635）升勢一發難收，搶上1.13元高收，再升9仙，連續大升4日，升幅逾40%，重升破晒10日、20日、50日同100日嘅平均線，短期在1.2元的前徘徊區底部會有好大阻力，相信亦會趁勢進行調整。呢家有機會在明年營造另一個神話嘅公司，每一次嘅調整，都係低吸機會。
銀建（171）、華豐（364）同遠東發展（035）都發力，銀建收1.79元，已擺脫3條短期平均線，同埋3個多月來的降軌阻力，短線上升目標指向2.2元。銀建大股東信達近期再攞埋2000多億嘅不良資產，相信遲啲都會益到銀建。
華豐高收0.9元，升5仙，突破上月初0.86元的3次高位阻力，10日及20日線好快會升破50日線，中期升浪確認，1年目標價維持1.2元。遠展亦係連升3日，高收1.51元，升8仙，04年（3月年結）業績好快會宣布，往績PE約10倍，05年度預測盈利會再倍計上升，預測PE只得4至5倍，年底股價有機會見2字頭。佑威（627）再升3.4%，下禮拜一派成績表，應會有刺激；至於同屬進軍納米業務嘅金威（910）亦開始有動作，收0.4元，升1仙，成交增至2793萬股，要留意。
工業股紛紛開車，聽聞今年生意好好嘅德信科技（1228），搶上0.345元收市，升6.1%，成交更去到1806萬股，比上周五大增6.3倍。德科喺0.3元至0.34元間整固成3個月，今次有咁大成交帶動，股價好大機會升番上5字頭。
德科新廠陸續投產，加上擴大垂直運作，邊際利潤提升，而新建的STN液晶體顯示屏生產線亦已投產，主攻外銷市場，由於呢類產品好hot，預期可為集團帶來好可觀貢獻。
德科03年（12月年結）賺5689萬元，估計04年盈利可達9000萬元，每股盈利6.3仙，05年更可上升至7.6仙，即使股價見0.5元，預測PE亦只係6.5倍！
郭兆誠