沙士報告書出籠，特首不但全無責任，重受高度讚揚，話我哋阿董具有愛惜生命嘅仁愛精神，一早就睇得出要隔離啲病人，只可惜，下面班細嘅唔生性，包括靚仔局長單身強，同埋榮獲鬼佬睇起、由世衞組織高薪挖角、成功與國際接軌嘅「香港人的光輝」陳馮富珍，話佢哋發布混亂訊息，誤導市民。
榮耀全歸我主，經一事長一智，下低嘅盡係罪人。不過唔使驚喎，係罪人都唔使問責。楊永強重係高官厚祿，沙士一周年，佢領多四五百萬年薪，而陳馮富珍就更加風騷，打入荷李活，今次佢就以國際官員嘅身份，發表書面聲明，警告特區市民唔好「事後孔明」咁話。
報告書話：另外梁智鴻、何兆煒、高永文，個個都係衰仔，得阿董係好人。至於醫療高官馮康，就話好多事「望番轉頭，可以做得更好」。不過，堂堂一個政府，若果淨係識得「望番轉頭」，至事後發覺「可以做得更好」嘅話，咁啲國民，要呢個政府做乜？
若然有一日拉登襲港，喺尖沙嘴炸咗兩間酒店，當場炸死一千，炸傷五千，九龍半島大亂，彌敦道當場踩死一萬人。政府全無防範，警隊踢腳，飛虎隊冇影，醫院唔夠血漿，病床病房又冇位，只係一片嘈喧巴閉，事後可唔可以除咗賴拉登冇人性之外，重話「望番轉頭，可以做得更好」？
人生好多嘢，係冇得望番轉頭嘅。一國兩制失敗，港人治港破產，若然死鬼老鄧，喺黃泉之下，識得望番轉頭，佢都知道自己當年決定收回香港係好老襯。
一個強勢政府，日日嗌「行政主導」，職責就係一早就識得望向前，見人所不能見，望得高、望得遠！而唔係同六百萬人一齊，喺死人冧樓雞毛鴨血之後先至齊齊望番轉頭。自稱精英，個個四五百萬年薪，有事只識得望番轉頭，使乜請你做高官？阿貓阿狗做咪又得？
至於陳馮富珍，叫人唔好「事後孔明」。立法會咁多個調查委員會，就全部係「事後孔明」嘅組織。
原來「追究責任」、「總結經驗」，係「事後孔明」嘅同義詞，美國導演米高摩亞嗰套「華氏九一一」紀錄片，指罵布殊危機管理無方，話布殊家族一早同拉登有勾結，又何嘗唔係「事後孔明」？點解又會全球咁收得？
「望番轉頭」，若然唔係有曾憲梓成班口臭商人，又點整多鑊五十萬人七一大遊行？一個政府，危機管理無方，累死三百條人命，阿頭嘅「健康好重要」，而班問責高官，唔係識得「望番轉頭」就係喝斥批評嘅聲音係「事後孔明」，呢個政府要嚟有乜用？係李柱銘唱衰靠害、肥彭整蠱，定係民主派勾結沙士病毒呢隻外國勢力所導致？人大常委會唔知可唔可以解釋吓？
傳真︰2623-9278
電郵︰