教會團體一向有自置物業，通常多揀選低層連平台單位，大手租用物業情況較罕見，不過最近就出現一宗。中原地產九龍商業部董事麥偉嫦表示，一家教會團體剛承租佐敦新寶廣場十五至十八樓共四層，近一萬七千三百呎，作為日常運作同崇拜之用。租期六年，月租二十萬七千，呎租十二元，係近期區內最大一宗租務成交。租客除獲免租期外，重包埋管理費。
麥偉嫦透露，教會原本在區內自置七千呎單位，因不敷應用，先至搵地方租，睇過旺角同佐敦道啲寫字樓，因新寶廣場屬新樓，位處大單邊，又近地鐵站，所以最後揀呢度。佢透露該教會都想自置，但區內物業主要由大業主持有，冇選擇。
新寶廣場前身係新寶戲院，由「戲院大王」陳俊巖家族持有，共十三層寫字樓，現時尚有三層放租，不包管理費呎租叫價十二元。
祥益地產屯門出咗對孖仔代理，分別在碼頭區同埋屯門市中心分行任職，因為佢哋生得餅印一樣，就算喺唔同分行，都有客認錯，重因為咁而做成單生意。
話說任職碼頭分行嘅細孖陳輝，上個禮拜招呼個客，因為揀唔啱心水單位，所以約好第二日再睇過。當日客人早到，細孖未出現，就喺呢個時候，原本在市中心分行工作嘅大孖陳光，因為帶客去碼頭，個客就誤認佢係陳輝。
將錯就錯，大孖就扮住細佬招呼買家，冇幾耐細孖出現，個客嚇咗一跳，不過最後都以一百零六萬，買咗個邁亞美海灣單位；真係錯有錯着，兩兄弟聯手做成生意。
政府早前計劃在上環文武廟對開的四級平台，發展作「文化梯田」，附近物業價值自然提升。置華物業董事李健民透露，由投資者持有嘅皇后大道中金祥大廈，正在市場放售，叫價八千萬。物業在九九年落成，為一幢二十四層高住宅大廈，總樓面二萬五千九百九十五呎。五至二十四樓獲准改建服務式住宅，業主計劃投放近一千萬改裝。
去年本港爆發沙士，搞到滿城風雨，今年全港嚴陣以待，沙士就唔見，但卻突然出現日本腦炎，搞到各界，特別係管業公司，要全力進行滅蚊工作。
恒益旗下管理的近百七幢物業，由六月中起，進行一連串清潔同杜絕蚊患工作，包括成立防蚊監察小組、區部防蚊糾察隊及總所滅蚊大使，同承辦商定期執行清潔及防蚊程序。
另外，富城物業都話已經展開全城滅蚊大行動，在兩三個月內為三百二十幢管理物業，做清潔及滅蚊工作。
美聯日前披露，集團上半年有逾百員工平均月入過十萬，市場反應都幾大。噚日佢哋再公布自6月6日美聯盃賽馬日後，集團促成多宗大手成交，好似旺角西洋街舖位，呎價二十五萬元，成為金融風暴後新舖王；逾三千萬的豪宅成交都有好幾宗。美聯馬灣珀麗灣分行就喺六月做到近百三萬營業額，為藍籌屋苑冠軍。
另一邊廂嘅中原地產，西半山輝煌臺分行六月佣金收一百二十六萬，表現理想。
蘭西
電郵地址：