歐洲國家盃終於曲終人散，決賽一戰希臘以一比零贏咗葡萄牙，任達華前晚都有去有線睇波，重做埋李燦森、葛民輝主持嘅節目《EUROGOGOGOAL》嘅嘉賓。
喺明星足球隊守龍門嘅華仔，去到有線十分興奮，佢重主動話要同十一位靚女影合照，不過一講波就火都嚟埋，不停狂鬧碧咸，華仔話：「碧咸啲波，個龍門我守都得啦，我唔郁個波都自己飛上天！佢真係好屎波，只係包裝得好，佢梗係有大賽憂鬱症，好心唔好做隊長啦，又要做隊長又要射失。」
華仔話佢老婆琦琦好鍾意碧咸，因為鍾意靚仔嘛，華仔話：「我叫佢轉軚，佢𠵱家捧施丹、卡路士同基斯坦奴。」問華仔係咪妒忌碧咸靚仔，佢話：「唔係，佢真係差嘛，我係『鑽石』龍門，一係俾佢射我守，我咪特登俾佢入囉。」華仔話今屆歐洲盃同人賭咖啡都贏咗三千幾杯，但一場捷克對希臘就累佢輸咗千幾杯咖啡，因為佢買捷克，於是佢又狂鬧嗰場波嘅球證。
馮仁昭噚日凌晨都有睇場波，重見到電視影住賭王何鴻燊坐喺球場嘅貴賓席，何生有葡國血統，睇怕佢睇完場波都係失望而回。
尹子維噚日喺黃埔衛星電視寫字樓見記者，宣傳佢幫衛視主持嘅節目《OpeningNight》，呢個節目主要係介紹大製作嘅西片，一個月播一次，每次播半個鐘，第一集介紹《智能叛變》。尹子維話酬金理想，不過今次做呢個節目並唔係為錢，而係為興趣，自己都係拍電影，所以好有信心會做好呢份工作。
李克勤噚日喺新城出席活動，佢將會喺十月再為新城舉行音樂會，而新城噚日特別送出一件同佢女朋友個名一樣嘅Emily公仔T恤畀克勤，令佢十分尷尬。另外，克勤同譚詠麟主演嘅電影《左麟右李》目前重研究緊劇本，但女主角就打算搵吳君如演出。
王力宏同台灣天后張惠妹嘅緋聞撲朔迷離，前晚記者向王力宏提起呢單嘢，佢即刻扮聽唔到，反而佢老友黑人就幫口否認。至於王力宏會唔會做阿妹演唱會嘅表演嘉賓，佢就話：「如果有機會的話，應該是沒問題。」記者不停追訪王力宏，黑人竟抵死咁話：「搞不好人家本來是有可能的，被你們這樣一搞，不就沒有了，他們兩個很配，如果他們真的，也會祝福他們。」
