梁詠琪（GiGi）早前到峇里島拍新歌MV和唱片封套，入住帝王級酒店，她在房間面對森林享受露天花灑浴時，卻忽被偷窺。GiGi在驚慌中發現偷看她的原來只是一隻猴子，總算保住清白。
梁詠琪早前應商台邀請到峇里島介紹當地旅遊景點，順道拍攝新碟封面和新歌MV，GiGi此行逗留了一星期，最難忘是入住帝王級酒店，房間設備和服務均一流。
GiGi說：「各地皇室人員去峇里都會住嗰間酒店，間房真係好大，有兩層高，四間房，一個私家泳池，不過最特別係有露天花灑浴室、露天廁所同按摩池，間房重有個搖鈴，搖響佢就有三個專責服務員走嚟服務你，好犀利。」代價是一晚租金至少三千六百元美金（約二萬八千港元）。
問GiGi在露天浴室洗澡時，怕不怕被偷窺？她說：「發生咗啦，個露天花灑係對住個森林嘅，但個森林都係屬於我間房，照計唔會有人入到去，但我沖沖吓涼突然有嘢企咗喺度睇，嚇死我，點知望真啲原來係隻馬騮，驟眼以為係個人㖭。」
皮膚白皙的GiGi因為白天要開工，故只能游夜水，自然沒有曬黑，她在當地最後一日還自掏腰包請大隊吃飯。
GiGi說：「嗰度有好多嘢食，啲海鮮好好味，不過我梗係冇肥到啦。但我最鍾意都唔係食物，而係嗰度有好多藝術家，開咗好多畫廊，我本來好想買畫返香港，但因為太大幅，好難搬運，所以放棄咗。」
