昨日又有股票玩笨豬跳，今次係話要轉往主板有一段日子嘅東大照明（8229），江湖傳聞公司因為同核數師講唔掂數，需要延遲公布業績，有個別芬佬驚起上嚟，不問價沽貨，先至搞到場面咁混亂。
東大照明噚日最低被質到落7.5仙，收0.161元，大跌44.5%，成交股數高達7219萬股，金額1279萬元。
東大照明上市以來，名聲一向都OK，小初真係估唔到佢會搞成咁。經紀黃話，因為隻股係創業板股，所以投資者信心始終差啲，如果想趁低博反彈，最多彈幾格就要食胡，唔好太大貪。
除咗東大照明插水外，噚日個市其實幾悶蛋。經紀黃建議小初，不如玩吓新股好過，上個星期有幾隻新股招股，其中最有機會炒作，睇嚟係生產成衣嘅聯泰（311）。
聯泰今次招股定價，上下限為每股2.325至3.025元，發售2.25億新股，集資總額介乎5.23至6.81億元。由於裕元（551）已經要咗一大截，真正出街嘅貨實在冇幾多，加上兩家保薦人往績唔錯，所以聯泰應該有得諗。
慕容小初