距離立法會選舉只有兩個月，備戰氣氛日漸濃厚，金融服務界功能組別，終於有人出來宣布參選同公布政綱，佢就係全國政協委員張華峰（圖），相信佢係第一個有講政綱嘅參選人。張老闆係恒豐證券董事長，做股票經紀超過三十年，佢話自己嘅優勢係每日都有參與前線工作，好了解監管機構嘅規例，佢認為有好多地方值得斟酌，對中小型經紀行發展不利，所以佢喺政綱話建議成立具法定地位嘅證券業公會，負責制訂監管經紀行嘅規例。
呢個界別嘅選舉聽講重有四個人，張老闆話，梗係有信心先至企出來，但佢就唔肯估計勝算，只係話今日開始會加倍努力。對於被視為佢勁敵嘅潮州怒漢詹培忠，話晒都一場老友，張老闆冇直接批評對手，但就話自己鍾意以對話、協調方式爭取權益，唔會激烈對抗，亦唔會求一時之氣去發洩。至於有人話佢已獲北京祝福，佢就不置可否，但佢唔覺得呢啲係負面因素，因為業界向內地發展先有出路。
傳真︰2623-9278
電郵︰