上周五美股第二日下跌，但跌幅輕微，對港股影響有限。港股如果再回落，就應該趁低買啲Call輪。QDII愈傳愈真，有頭有面嘅業內人士，都俾報章引述話QDII好快好快出台，紅籌國企將係受惠股份。
中信泰富（267）近期升得唔多，落落哋後，睇上多過睇落。搵中信Call輪炒，標準輪方面冇乜對象，9291輪價9.1仙，本來20.9倍槓桿率可以諗吓刀仔鋸大樹，不過下月初到期，時間因素不利，而溢價又有4.2%，如果正股𠵱家水平拖多一陣，隻輪就冇得剩。可以考慮嘅係非標準輪9566，屬平均結算輪，輪價7.7仙，睇實際數據好麻煩，交投勁，有128球易手，明年8月至到期，唔使太計較啲數據，總之正股移動方向正確，揸隻輪就有機會賺錢。
中集運（2866）上周五有勢，收2.925元，升幅4.5%。中集運潛水，炒浮水。航運與物流相關股份，可以諗些少。中遠太平洋（1199）與招商局（144），有機會受到帶挈，不過可供選擇Call輪有限。中遠Call輪揀9315，11月到期，輪價24.7仙，溢價4.4%，槓桿率4.4倍。招商局Call輪揀9264，下月中到期，輪價11.3仙，溢價1.2%，槓桿率9.3倍，呢件爆炸力，勁過9315好多。
國內缺電，大唐（991）睇好，吼Call輪9360，10月到期，輪價1.34元，溢價3.9%，槓桿率4.6倍。
章盛