是非精平日好鍾意扮貴婦，但其實佢份人就認真麻麻，虛有其表，剩係佢去廁所唔沖廁呢家嘢就已經得人驚啦！
是非精喺港島區一幢商業大廈入面有間寫字樓，有日是非精人有三急，走咗去寫字樓出面嘅洗手間解決，而個女廁就只係得兩格，當時有位正在排隊輪候嘅OL，同啱啱解決完嘅是非精迎面相遇，是非精同OL講話廁所冇水，OL就好自然咁叫佢攞個水桶沖廁，點知是非精即時拉長塊面，好不屑咁同OL講：「用水桶呀？」
是非精一講完就走咗出去，隔咗幾秒就有個是非精間公司嘅女職員走咗入洗手間，好無奈咁攞住個水桶幫事頭婆沖廁，嗰位OL就睇到眼都凸埋。其實唔止佢，馮仁昭聽完都嚇一驚，是非精冇衞生兼極之刻薄，自己去完廁所好應該自己解決番清理問題啦，有乜理由要人哋幫佢清潔，呢啲就真係叫做冇家教。
台灣女子組合S.H.E早前為台灣7-11拍攝新一季飲品廣告，三位靚女嘗試咗啲新造型，鬥法睇吓邊個最懂消暑之道，Selina頭戴電風扇，佢話覺得自己好似變咗孫悟空，Hebe個頭就塞喺個巨大魚缸裏面，重含住支飲管、Ella就表演鐵頭功，用頭去撞冰，最後佢哋三個重戴咗「北極熊」頭套，扮鬼扮馬，搞到全場人笑不停。
劉愷威第二年做MenceBeauty代言人，噚日佢喺元朗為間新店剪綵，重搵埋爸爸劉丹撐場。愷威話今次再續約，加咗四倍人工，佢重大爆話劉丹好貪靚，所以就介紹爸爸去減肥，佢重好努力咁減肚腩。反而自己呢排因為要開工，所以減唔到。
趙薇同陸毅合作嘅電影《情人結》已經煞科，但之前拍攝嗰陣就有唔少是非，好似喺哈爾濱工業大學取景時，學校千五個學生聯名同傳媒投訴劇組喺拍攝過程，對學生讀書同生活造成不便，因為咁而停工四日，陸毅接受訪問時就話覺得係因有啲學生攞唔到簽名所以搞事，馮仁昭覺得呢個藉口似乎牽強咗啲喎。
有報道話吳卓羲前日喺黃竹坑警察訓練學校拍《學警雄心》時，因為遲到連累外景隊俾警校趕走。《學》劇監製黃偉聲噚日好勞氣咁話：「噚日有雷暴警告，警校校長擔心我哋拍唔晒，咪叫我哋改第日囉，佢重話噚日唔會收我哋場租㖭！吳卓羲只係遲咗少少，無端端扯埋佢落水，真係離晒大譜！」
