康文署日前就許冠傑（Sam）演唱會超時發警告信，並因一句「後果自負」令主辦單位及歌迷極度不滿，發炮怒斥政府。康文署有見事件引來極大迴響，遂於昨日急忙召開記者會「補鑊」，並作出讓步允許阿Sam個唱繼續超時。
歌神許冠傑在紅館舉行的演唱會，因為晚晚超時而遭康樂及文化事務署發警告信，要求阿Sam演唱會在晚上十一時半前完結，否則「後果自負」。康文署的強硬態度，令阿Sam和主辦單位恆藝亞洲負責人丘亞葵不滿，開記者會炮轟當局，而阿Sam更感心灰意冷，有意取消十月個唱。
公眾假期開記招
康文署發信警告阿Sam一事惹來市民反感及很大迴響，而本報記者日前訪問散場的歌迷，他們亦對康文署的用語極度不滿。康文署在昨日公眾假期急忙召開記者會及發聲明「補鑊」，揚言會盡量配合阿Sam個唱，允許阿Sam演唱會繼續超時。昨日下午，康文署助理署長麥建琳先與丘亞葵開會商討阿Sam超時問題，繼而邀請丘亞葵及陳達志（Ba叔）一起出席在紅館舉行的臨時記者會。
麥建琳說：「今日我哋同丘生會作進一步了解，增強溝通共識，其實場館一直致力為租用者提供服務，許冠傑演唱會都唔例外。好多時演唱會散場，署方要同唔同部門做安排，等有足夠配套，即係有足夠公共交通工具提供畀市民返屋企。八月份重有十場，我哋一定會加強溝通。」丘亞葵則在記者會上多謝康文署主動跟他們溝通。
「『後果自負』係提示」
記者問康文署何以突然召開記者會時，麥建琳說：「我哋一向好重視租用者，我哋只係想澄清一下，等大家明白呢件事。」未知康文署有否要求阿Sam將個唱時間縮短？麥建琳說：「我哋開會了解過，知道製作單位有困難，總之場館會盡量配合，其實我哋只係要有一個清晰明確時間畀到我哋啫。」問到康文署信中提及到「後果自負」是指甚麼時，麥建琳解釋謂：「字眼上係場館租用者要負責嘅條款，係一個提示，唔係警告。今次事件唔會影響到阿Sam十月演唱會申請，因為每個申請係獨立考慮，我哋亦冇黑名單呢回事。」
八月個唱減嘉賓
記者會前，阿Sam曾跟丘亞葵傾談，丘亞葵說：「阿Sam同我講，話萬事以和為貴，𠵱家紅館肯畀我哋超時，只係要我哋畀一個清晰嘅散場時間，我估計呢兩晚會做到十二點十分左右。至於八月點樣就要再開會傾，或者到時cut嘉賓囉。其實我哋入咗紙申請埋八月十四同十五號再加兩場，但未知成唔成事，十月開唔開得成亦要睇紅館批唔批。」
此外，阿Sam前晚唱到凌晨十二時十分，其間利孝和夫人也有前來捧場，獲阿Sam錫錫。
採訪：李珮洳 攝影：陳偉權、陳志嵐
