踏入七月，基金經理做完半年結，開始陸續放暑假，班上市公司管理層亦可趁機會唞暑。不過，仍然有藍籌地產公司高層好搏殺，最近周圍點火嘅陳啟宗，旗下嘅恒隆地產近日就出咗份內部調查報告，將香港地產股，按九七年高峯期股價同今年六月三十日收市價，計出市值，比較結果發現恒隆地產係唯一一間市值有升無跌嘅地產公司。而跌得最甘嘅就係新世界發展，同九七年八月市值最高達一百五十億美元時比較，現時新世界市值跌咗超過八成。即使長實同新地兩大地產商，亦跌咗五成半同四成。
捧到自己咁高，八方就因應份報告，搵朗尼陳嘅愛將吳士元同佢傾兩句，正所謂唔做唔錯，當年樓市旺盛時，恒隆因為經營保守，曾經俾股東質疑，亦錯失過唔少買地機會。點知佢話，「你可以話我哋保守，但亦都睇到我哋有眼光，冇同人爭地」。
傳真︰2623-9278
電郵︰