現年七十九歲嘅老牌影星保羅紐曼（PaulNewman、右），係人都知佢係一名賽車發燒友。前日佢又去到康湼狄格州，參加當地一個挑戰賽。喺頭嗰三分二賽程，保羅一直都穩佔頭三位，可惜距離完場重有十五分鐘之際，佢架賽車因為齒輪箱故障兼且出現漏油嘅情況下，被迫退出。眼見獎盃就快攞到手，但係最終未能完成賽事，我羅拉真係戥佢唔抵。