莎莎宣布全年業績，盈利大躍進，賺一億五千萬以上，並且宣布派高息，主席郭少明可得八千二百九十萬元。郭先生本是公務員，識得睇通形勢，開設水貨化妝品店，專賺女人錢，一路賺到今時今日咁巴閉，真能人也。佢最近抽馬得咗，既然收咁多股息，不妨買隻靚馬返嚟，威過「明豔照人」與「靚得精彩」呢兩匹三四班浮沉馬。
莎莎、卓悅化妝店經常人頭湧湧，擠滿自由行遊客，據講遠至雲南貴州，都有人知道「去香港，到莎莎」。莎莎店內，有一隻護甲產品，LCN，左丁山從來唔識護甲修甲，唔知係乜。呢晚LCN老闆娘蔡太請客，聽佢講指甲、腳甲，方知道其中學問無窮。在座嘅李太、麥太、岑太、林太聽到津津有味，左丁山就聽極都唔明，只識一句說話：「女人身體，商機無限。」蔡太高聲讚好：「係㗎。嗱，女人洗頭電髮染髮，不可或無，塊面做facial，係好基本；之後纖體瘦身，點可以唔做。手指甲要見人㗎噃，一定要整得靚靚，腳趾唔靚嘅話，譬如跳得芭蕾舞多、長跑運動員，腳甲一定受到破壞，唔修理點見得人呀……」嘩，女人由頭到腳，由大拇指至腳趾尾都係可以出金礦嘅，愈係發達社會，女士嘅錢愈容易賺，呢啲生意唔做就笨。
蔡太夫婦代理LCN產品兼開辦手甲腳甲護理專門店，十七年來，行內人無所不知。蔡太幾年前到深圳，視察修甲行業，一間修甲店貼出一張大海報，上書「蔡太主理」。蔡太走埋去一望，咦，海報嘅女士大照片，咪係自己？於是走入店內，女招待立即招呼：「我哋係蔡太主理㗎！」蔡太話：「我就係蔡太。」女招待望佢一眼，立即搣番張海報落嚟。