2004年萬寶龍國際藝術贊助大獎，特首董建華親妹金董建平（圖）係十個得獎者之一，以表揚佢過去二十年推動文化藝術不遺餘力。其他得獎者來自多個國家，中國代表SOHO中國聯席董事長張欣，因為「長城腳下的公社」呢個專案備受讚賞，另外法國、德國、英國等地都有人得獎，頒獎禮將會於星期四晚舉行。
講開金董建平，佢生於上海，成長於香港，一直熱愛藝術同中國文化，呢位船王之女喺美國賓夕凡尼亞大學取得英國文學學士學位後，八一年喺香港創立藝倡畫廊，專門介紹華裔畫家，例如法國嘅趙無極、美國嘅趙春翔、丁雄泉同費明杰等。
金董建平攞獎，今次都唔係第一次，佢曾獲法國文化部部長杜彭頒發法國文化界最高榮譽嘅「藝術與文學騎士勳章」，香港（海外）文學藝術家協會頒發「全球傑出華人暨中華文學藝術家金龍獎」，威過佢大佬。
傳真︰2623-9278
電郵︰