本地學生陸續開始放暑假，好多家長正為仔女精挑細選一啲有益身心嘅暑假活動，務求令仔女發揮潛能、增進知識，度過一個既充實又多姿多采假期。
不過，喺香港呢個貧富懸殊嘅社會，唔係個個小朋友都豐衣足食同得到適當栽培，香港社區組織協會前排發表嘅一份調查就指出，本港有14萬5千多名兒童靠綜援金生活，佔兒童整體人口超過十分之一。
調查發現，受訪嘅七成半綜援兒童要「一餐分為兩餐食」、三成半曾因屋企太窮要捱餓。此外，九成受訪兒童好少同屋企人出外消閒玩樂，當中有些更加因為家庭經濟拮据，不能參與學校旅行同課外活動。
大使愈睇呢份調查報告愈心噏，但願社會上有更多熱心人做善事，與人分享生命嘅富足，咁香港唔單只係飲食同購物天堂，更加成為充滿愛心的社會。
蘋果日報慈善基金設立嘅「童夢成真」專戶，正係透過募集善長捐輸，致力為貧窮兒童達成心願，令孩子開心滿足。呢個專戶，曾送出波鞋、書包、電子發聲辭典、童軍制服、單車、兒童圖書等物資，另安排小朋友免費學電腦、睇電影、遊海洋公園、睇馬戲表演等等，為貧窮兒童增添歡樂。今個暑假，基金將會陸績安排啲益智活動畀班小朋友。讀者捐款支持，可令更多孩子如願以償，感受關懷。 「童夢成真」專戶捐款編號：C0121
暖流熱線
電話：29908688
傳真：23702192
電郵：
網址：