每逢夏天一到，日本嘅少女都好鍾意着住佢哋嘅傳統浴衣，同班朋友去祭典玩，又或者同男朋友去觀賞煙花大會，話會浪漫啲喎。我大口羅拉近排就搵咗啲日本女星着浴衣嘅靚相，畀大家欣賞下，等大家感受吓日本嘅夏日氣氛。
最近忙緊趕拍日劇《縮水情人》嘅深田恭子，早排應雜誌嘅邀請，同《縮》劇嘅男主角二宮和也一齊着起浴衣影咗輯靚相。睇見佢哋兩個食西瓜嘅冧樣又真係幾浪漫噃，連我羅拉都有啲忍唔住想咬番啖！
而前排同日本妖男Gackt拍咗輯超激全裸美容院廣告嘅黑谷友香，今次着住件密密實實嘅浴衣，遮掩咗佢完美嘅身材，而佢咁樣打扮，成熟到好似日本傳統阿嬸咁樣，真係有啲嚇人。
另外，𠵱家喺無綫播映緊嘅日劇《夢想飛行GoodLuck！》裏面，扮演成日想嫁畀木村拓哉嘅野蠻空姐內山理名，着起一套充滿少女味嘅粉紅色浴衣，即時成個人溫柔晒，睇怕都迷死唔少男fans。