老牌天主教名校九龍華仁最近選出咗八十名對九華同社會有貢獻嘅神父、老師同校友，左中右嘅人物都有齊，政界最明顯，白鴿黨前主席李柱銘係九華老大哥，1955年畢業；與佢同走民主路嘅師弟有涂謹申（80）以及梁家傑（76），但係同佢唱對台嘅同門亦唔少，包括有劉漢銓（64）同邵善波（67）。為老董效命當智囊嘅，最出名係王于漸（68）路祥安（70）以及練乙錚（68）。
唔講政界，九華都出唔少商界同法律界精英，好似大師兄李業廣（53）、身家勁厚嘅邢李火原（67）、陳祖澤（59）、王式英（60）、梁定邦（62）、朱家欣（65）、吳天海（69）同袁天凡（70），做官嘅有前工務局局長鄺漢生（57）。
九華當然出名醫如謝德富（61）以及專業人士，比較特別係黃效文校友（67），係一位著名探索家，而原名曾貫一嘅曾江（54）更是係人都識嘅演員。
講到源頭，已故嘅創校校長徐仁壽當然最傑出，因為1924年佢創辦九華之時，只有二十四個學生，校址係砵蘭街樓上。
（按：括弧內為畢業年份）
傳真︰2623-9278
電郵︰