日本性感女星MEGUMI雖然喺日本已經上晒位，但仍然不忘一班水着fans，耐不耐都會騷吓身材影影水着相慰藉一下佢哋。
早前MEGUMI就幫日本雜誌《B.L.T》拍咗一輯性感靚相，除咗有平日大家見慣見熟嘅性感水着相之外，MEGUMI重換上性感晚裝，展示滑溜玉背，表現佢成熟同野性嘅一面。
雖然MEGUMI喺日本已經鬼死咁忙，拍劇、主持、廣告瓣瓣都有份，不過其實一直以嚟佢都好「恨」做歌手。雖然之前嗰兩隻細碟反應麻麻，不過MEGUMI一於好少理，下個月十四日佢將會推出第三隻細碟《就是喜歡》。
今次新碟搵嚟唔少音樂界猛人幫手，包括曾經同過濱崎步、CHEMISTRY以及SMAP等日本歌手同組合合作過嘅日本搞鬼HipHop組合決明子嘅RYOJI負責混音，而日本創作女歌手SILVA就會幫手作曲填詞。而MEGUMI之後重會出席連串嘅talk騷同minilive，佢咁落力，睇嚟都係想隻細碟大賣啦。