近來有唔少新股上市，令股民目不暇給，舊年認購IPO新股，如中人壽、紫金等，上市第一日即沽，賺得好穩陣。今年冇呢支歌唱咯，買「平安保險」都唔平安啦，認購新股，隨時食驚風散，博唔過。
有IPO，就會浪費大量紙張。本本招股書都鬼咁厚，印出嚟其實冇乜人睇，形式多過實際，有興趣嘅人士攞招股書返屋企或者寫字樓，好快就用晒啲地方，冇空位擺，唔丟唔得。
靚女L因職業關係，收集每一本新股招股書，上星期一口氣攞咗六本。寫字枱後嘅書架已經滿座，惟有擺上寫字枱，幾乎遮住晒部電腦。左丁山問佢：「攞嚟做乜，真係有睇？」靚女L話：「梗係要裝吓啦，做節目時如果有聽眾打電話嚟問，我就有好多資料講！」左丁山又問：「最鍾意睇招股書邊一部份？」靚女L話：「董事住址！董事住響邊，甚有啟發性！」咁奇？好多上市公司董事都係住喺半山區、南區、九龍塘、太古城以至山頂等地方，有乜啟發性呀？
靚女L話：「唔係噃，我最近睇到一單IPO公司嘅財務董事嘅住址係在一間公共廉租屋之內，Thattellsmesomething！」係？住響廉租屋唔得咩，冇規定話上市公司一定要住喺種植道㗎？靚女L有冇歧視公屋住客？
靚女L好淡定咁講：「我有好多朋友住在公屋，許冠傑都係喺蘇屋邨長大嘅啫，我點會歧視公屋住客。不過咯喎，你貴為上市公司董事，年薪點都有七八十萬以上，重有乜資格住在公屋？你係超級富戶噃，重霸住間公屋，快啲搬出嚟，讓間屋畀有需要人士啦！呢啲人分明係貪便宜，唔老實，叫我點買佢間公司嘅股票？」